فقہ؛ شریعت کی فہم سلیم
زیر نظر کتاب “فقہ؛ شریعت کی فہم سلیم” محترم مولانا مفتی محمد مصعب صاحب زید علمہ کی نئی تصنیف ہے۔ اس کتاب کی تخلیق کا مقصد مسجد میں خواتین کی باجماعت نماز کے مسئلے پر پھیلائی جانے والی غلط فہمیوں کا اصولی جائزہ لے کر ان مسائل پر غور و فکر کے لیے درست راستہ فراہم کرنا ہے۔ مولف نے امت مسلمہ کے متوارث طرز عمل کا خلاصہ پیش کرتے ہوئے ان جدید نظریات کی نشاندہی کی ہے جو فقہ اسلامی اور مجتہدین کے استنباطات پر اثر انداز ہوتے ہیں۔
اس کے بعد اکابر دیوبند جیسے حضرت گنگوہی، حضرت نانوتوی، حضرت شیخ الہند، حضرت تھانوی رحمہم اللہ اور دیگر اساطین علم کی تصریحات کی روشنی میں فقہ کی حقیقت کو اجاگر کیا گیا ہے۔ پھر شرعی احکام کی درجہ بندی، فروعی اختلافات کی حیثیت اور دین کی نقل صحیح میں محدثین کا کردار جیسے اہم موضوعات پر بھی سیر حاصل گفتگو کی گئی ہے۔
مزید برآں، دور نبوی سے علوم شرعیہ کے منتقل ہونے کی جامع تاریخ بیان کی گئی ہے، جس میں شریعت میں عمل متوارث کی اہمیت اور حجیت پر روشنی ڈالی گئی ہے۔ خواتین کی مسجد میں باجماعت نماز کے مسئلے پر متقدمین و متاخرین اور اکابر کی تصریحات کا جامع خلاصہ بھی شامل ہے، اور دور نبوی میں خواتین کی تعلیم و تربیت کے نظام کو بھی پیش کیا گیا ہے۔
میں نے اس مسودہ کو بہت غور و خوض کے ساتھ حرف بہ حرف پڑھا ہے، اور کافی عرصے بعد اتنی دلچسپ اور گہرائی والی کسی کتاب کی نظرثانی کا موقع ملا۔ ہر صفحہ مولف کی محنت اور دعاؤں کا مظہر ہے۔ یہ تحریر وسیع و عمیق مطالعہ کا نتیجہ ہے، جس میں اکابر کی تصانیف سے ایسے اقتباسات پیش کیے گئے ہیں جو اس موضوع پر مزید گفتگو کی گنجائش نہیں چھوڑتے۔
کتاب کی زبان سنجیدہ، اسلوب علمی اور دلچسپ ہے، اور مجھے امید ہے کہ یہ کتاب طالبین حق کے لیے دین و شریعت کے صحیح فہم میں مشعل راہ ثابت ہوگی، ان شاء اللہ۔
میں اس اہم کتاب کی تالیف پر مولانا مفتی محمد مصعب صاحب زید فضلہ کو دل کی گہرائیوں سے مبارکباد پیش کرتا ہوں اور دعا گو ہوں کہ اللہ تعالیٰ اکابر کے علوم سے مزید شغف عطا فرمائے، دنیا اور آخرت میں برکتیں عطا کرے، اور اس اہم کاوش کو قبولیت عطا فرمائے۔ آمین۔
Fiqh; Shariat ki Fahm e Saleem
By Mufti Muhammad Musab
